Link açıqlığı

Saatnıñ esas haberi

Safinar Cemileva Krasnodar SİZOsında oğlu ile körüşüvge musaadeni elde etti


İyün 10 künü Krasnodar diyar mahkemesi tarafından 5 yıllıq apis cezasına maküm etilgen Hayser Cemilevniñ tuvğanlarına Krasnodar SİZOsında körüşüvge musaadeni berdiler.

Bunı Qırım.Aqiqatqa Ukraina halq deputatı Mustafa Cemilevniñ qadını, Hayserniñ anası – Krasnodarda bulunğan Safinar Cemileva bildirdi.

«Tünevin (iyün 16-da – muar.) Qırımdan çıqtıq, kene yahşı, parom keçiti çalışa edi, Krasnodarğa barıp çıqtıq. Bizge Haysernen körüşmege izin berdiler, oña bir şeylerni bermek isteymiz», – dedi Cemileva.

Onıñ sözlerine köre, körüşüv eñ yaqın zamanda olmalı. Bundan soñ olar Qırımğa qaytmaq niyetindeler.

O şunı da bildirdi ki, imayesi Rusiye Yuqarı Şurasına Krasnodar diyar mahkemesiniñ qararına itiraz arizasını azırlay.

«Yuqarı şurada ne aytacaqlarını daa bir buçuq ay bekleycekmiz. Bu vaqıt devamında Hayser SİZOda bulunacaq», – dedi qadın.

«Oğlum – reinedir, Ukraina vatandaşınıñ aqları bozulğan. Onı Vatandan marum qaldırmağa kimseniñ aqqı yoq», – qayd etti Cemileva.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler.

Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.

XS
SM
MD
LG