2015 senesi aprel devamında Qırımda tamır halqınıñ vaziyetine qıymet kesken türk nezaret eyeyteiniñ esabatı Halqara mahkemege Rusiye areketleri boyunca qarar çıqarmağa yardım eter, dep tüşüne Qırımtatar Milliy Meclis reisi Refat Çubarov.
Onıñ malümatına köre, Ankarada iyün 15 künü taqdim etilgen esabat «Moskva qonaqbayları içün şaşırtıcı oldı».
«Amma atta bu kibi diplomatik ceetten bayağı tüzetilgen, menimce, esabat Qırım işğalcileri ve Moskva qonaqbayları içün şaşırtıcı bir şey oldı… Mustaqil türk eyyetiniñ esabatı Halqara mahkemege Rusiye üzerinde qarar çıqarmağa yardım etecek vesiqalardan biri olur... «, – yazdı Çubarov Facebookta.
Türkiyeden Qırımğa insan aqlarınıñ vaziyetini ögrenmek içün yollanğan ğayrı resmiy eyyet yolbaşçısı Zafer Üskül bildirdi ki, eyyet Qırımda söz serbestligi, mahkeme meseleleri, tasil, mal-mülk ve mesken toqunmamazlığı ile bağlı insan aqlarınıñ bozulmasını qayd etti.
Türkiye eyyetiniñ Qırım vaziyetine dair maruzası Rusiye Federatsiyasınıñ prezidenti Vladimir Putinge de yollandı.
Alim ve uquq qorçalayıcılardan ibaret ğayrı resmiy Türkiye eyyeti 2015 senesi aprel soñunda yarımadanı ziyaret etti.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
