Halq deputatı, qırımtatarlarnıñ yetekçisi Mustafa Cemilev «Bağçasaray rayonında Rusiye İçki işler nazirligi bölüginiñ Qırım Cumhuriyeti boyunca İçki işler nazirligi» tarafından qıdıruvğa ilân etildi. Amma Ukrainada bu organ qanunsız tanıla, vesiqası – qanunsızdır ve uquqiy areketlerni meydanğa ketirmey, – deyler Ukraina İçki işler nazirliginiñ matbuat hızmetinde. Bu kibi cevapnı Qırım.Aqiqat mühbiri Mustafa Cemilev ukrain uquq qoruyıcıları tarafından qıdırılamı kibi sualine aldı.
Evel Ukraina halq deputatı Georgiy Logvinskiy öz Facebook saifesinde Mustafa Cemilev Ukraina İçki işler nazirliginde 2014 senesi Qırım Bağçasaray rayonından kelgen soratuv boyunca qıdıruvda olğanı aqta bildirgen edi. Bunı, Logvinskiy aytqanı kibi, Cemilevniñ maşinası qayddan alınğanda belli oldı.
Qırım.Aqiqatnıñ soratuvına Ukraina İçki işler nazirliginden resmiy cevap berdi. Mında deyler ki, Cinaiy qıdıruv departamentiniñ malümatına köre, Mustafa Cemilev Ukraina içki işler organlarınıñ esabatına köre, halqara qıdıruvdadır.
Malüm ki, Cemilev «Rusiye Federatsiyası Cinaiy Kodeksiniñ 224 maddesi boyunca cinayet etkeninde qabaatlana».
Qayd etilgeni kibi, Mustafa Cemilev Ukraina uquq qoruyıcıları tarafından qıdırılmay ve Ukrainada memuriy mesülyietke çekilmey.
