Qırımda «Artek» bala merkezine yahta, qayıq ve maşinalarnı bağışladılar. Bu aqta Qırım ükümetiniñ matbuat hızmeti salı künü, iyün 16-da, bildirdi.
Bala merkezine ediyelerni berüv tedbirinde Rusiye ükümetiniñ reis muavini Оlga Golodets iştirak etti. Bildirilgeni kibi, 90 yıllığı munasebeti ile «Artek»ke «6 altı kürekli qayıqnı, «Artekovets» katerini, yengil maşinalarnı, 20 «Оptimist» yelken yahtası ve diger ediyelerni» bağışladılar.
Rusiyeniñ Qırım işğalinden sebep Ukrainanıñ «Artek» Halqara bala merkezi» Devlet müessisesi Kiyev vilayetinde işine yañıdan başlap, «Puşça-Ozernaya» şifahanesinde yerleşe.
Qırımnıñ Rusiye Nazirler şurası «Artek» bala lageriniñ mal-mülkini 2015 senesi mart ayında Rusiye federal mülkiyetine berdi.
Ukraina Baş prokuraturası yanındaki Qırım Muhtar Cumhuriyetiniñ prokuraturası Qırımdaki «Artek» halqara bala merkeziniñ «devletleştirilmesi» boyunca cinaiy işni açtı.
