Rusiye devlet duması Qırım ve Aqyarda çetel yatırımlar üzerinde nezaretniñ quvetleştirilmesi aqqında qanun leyhasını qabul etti. Bu aqta iyün 16 künü RİA Krım bildire.
Deñişüvlerge köre, çetel yatırımcıları Yekâne devlet qaydına olarnıñ qocalıq cemiyetiniñ Qırımda qaydı aqqında yazuvnıñ kirsetilmesinden 90 kün soñra Federal antimonopol hızmetine, şirketi memleketniñ mudafaası içün strategik emiyetini belgilegen faaliyet ile oğraşsa, beş ve ondan ziyade isse fayızı aqqında malümatnı taqdim etmeli.
Aks alda böyle yatırımcınıñ rey berüv aqqı alınacaq,– denile beyanatta.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
