Yasaq etilgen «İslâm azatlığı firqası» («Hizb ut-Tahrir al-İslami») teşkilâtınıñ 20-den ziyade azası 2015 senesi Başkortostanda yaqalandı, dep bildirdi Terrorizmge qarşı milliy komitetniñ toplaşuvında salı künü Rusiye Federal havfsızlıq hızmetiniñ (FSB) yolbaşçısı Aleksandr Bortnikov, dep haber ete RİA Novosti.
«Bu sene fevralniñ dörtünde Uhta ve Başkortostan Cumhuriyetiniñ bir sıra diger mesken yerlerinde «Hizb ut-Tahrir al-İslami» bölüginiñ 23 azası yaqalandı. Olardan ekstremistik edebiyat ve teşviqat risaleleri alındı», – dep tekrarlay hızmet yolbaşçısınıñ aytqanlarını agentlik.
Rusiye İçki işler nazirligi bergen malümatına köre, Qırım Rusiye nezareti altına keçken soñ Qırımda «Hizb ut-Tahrir» teşkilâtınıñ tarafdarları dört qat eksildi.
Yanvar 23-te Aqyar civarında Rusiye FSB hadimleri üç insannı yaqalap, evlerinde tintüv keçirdiler. Bu kün mahkeme olıp keçti, yaqalanğanlarnı 2 ayğa qadar apiske aldılar. Olarnı yarımadada Rusiyede yasaq etilgen Hizb ut-Tahrir teşkilâtınıñ faaliyetini teşkil etüv ve iştirak etüvde şekleyler. Üçü de Ukraina havfsızlıq hızmetiniñ nezareti altında bulunğan edi, lâkin olarnıñ Hizb ut-Tahrir ile alâqaları isbatlanmadı.
2014 senesi mart ayında Rusiye Ukraina ve Ğarp tanımağan «referendumdan» soñ Qırımnı işğal etti.
