Aqmescitniñ Şmidta, 2 soqağındaki «Qırım» Fondu» hayriye teşkilâtınıñ Meclis yerleşken binasında qrımtatar tili derslerini teşkil etecek olalar. Bunı «Larişes» Qırım tarihiy müzey-qoruğınıñ tesisçisi Güliver Alti bildirdi.
Onıñ aytqanına köre, ocalar ile körüşüv keçirildi.
«Belli adamlar, oquv merkezini meydanğa ketirdiler ve şahsiy ders berüv tecribeleri bar. Müzey-qoruq qırımtatarca derslerinde qırımtatarlarnıñ tarihı ve medeniyetine emiyet bermege teklif etti. Meraqlı bir leyha olacaq, bir binada müzey (qırımtatarlarnıñ tarihı, medeniyeti ve dini boyunca sergi) yerleşecek ve qırımtatarca dersler berilecek. Bir yerde bir çoq bilgi alacaqlar, dep aytmaq mümkün», – dep yazdı Güliver Altin Facebookta.
«Qırım» Fondunıñ» baş müdiri Riza Şevkiyev Qırım.Aqiqatqa bu malümatnı tasdıqlap, onıñ eski añlaşmaları amelge keçirilgenini ayttı.
«Keçken sene sentâbr ayında «Larişes» müzeyi ile bu binanı (Aqmescitniñ Şmidta, 2 adresi boyunca, – muar. ) kirağa bermege añlaştım. İşğalden sebep inkişaf etmek imkânımız yoq edi, çünki Mecliske çalışmağa bermey ediler, men de binanı müzeyge kirağa berdim», – dep ayttı Şevkiyev Qırım.Aqiqatqa.
Onıñ qayd etkenine köre, mahkeme keçirilgende ve «Qırım» Fondunıñ» mal-mülki tevqif etilgende işbu añlaşma yerine ketirilmey edi.
«Şimdi kiracı mennen telefon vastasınen bağlandı, anda müzey ve qırımtatar tili derslerini açmağa añlaştıq. Er şey «Qırım» Fondunıñ» reberligi qurğan plan ve niyetlerge köre keçmekte», – dedi Şevkiyev.
Güliver Altin «Qırım» Fonduna» ait binada hanlar devriniñ «Kalga-sultan» tarih ve medeniyet müzeyi açılacağını bildirgen edi. Binada ilmiy merkez, kütüphane, arhiv ve fond anbarı yerleşecek.
2014 senesi sentâbr 16-da Şmidta, 2 adresi boyunca Aqmescitteki Qırımtatar Milliy Meclisiniñ binasında on eki saatlik tintüv keçirilgen edi. Neticede vesiqa, protokol, islâm edebiyatı ve bilgisayarlar alındı.
Sentâbr 17-de Meclis binasına mahkeme vekilleri kelip, bu bina ve «Qırım» Fondu» Hayriye teşkilâtına ait daa altı binanıñ tevqifi aqqında tenbiyelediler. Sentâbr 19-da Meclis binası müürlengen edi.
Kiyev rayonı mahkemesi «Qırım» Fondu» HT müdiri Riza Şevkiyevni 350 biñ rublelik para cezası ile cezalandırmağa, fondnı ise 4,5 million rublelik para cezası ile cezalandırmağa qarar aldı.
