Bu sene Odessada Qırım ve Donbassta olğanı kibi devlet avdarması olacaq edi.
Bunı Ukraina havfsızlıq hızmetiniñ (SBU) reisi Valentin Nalivayçeneo «24» haber telekanalındaki «Levıy bereg» yayınında ayttı.
Onıñ malümatına köre, anda «silâ, nişancılar, patlav tehnikası, farqlı cenk veteranları, provokatorlar, Rusiyege qoltutqan teşkilâtlar» azır edi.
Nalivayçenkonıñ qayd etkenine köre, isyan Odessadaki facialı adiselerniñ yıllığında yerine ketirildi.
«Mayıs 2-de öldürüv, patlav, zaptlar olacaq edi, yani başta Qırımda, soñra da Donetsk ve Luganskta olğan şeyler tekrarlanacaq edi. SBU mayıs 2-ge qadar kimse ve bir şeyni beklemeyip buña yol bermemek içün bir qaç kere kerekli tedbirlerni keçirdi», – dedi Nalivayçenko.
Onıñ malümatına köre, SBU temizlevleriniñ neticesinde 50 insan, şu cümleden 2 nişancı yaqalandı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
