Ukrainada iyün 26-da Qırımtatar bayraq kününi qayd etecekler. Faaller Qırım akimiyetinden yarımadada tedbirlerni keçirmek içün izin alamağan soñ esas programmanıñ keçirilmesi Kiyevde planlaştırıla. Bunı Qırımtatar yaşlar merkeziniñ Kiyev filialınıñ reisi Seit-Bekir Suleymanov Qırım.Aqiqatqa bildirdi.
Onıñ aytqanına köre, Qırımtatar bayraq künü ile bağlı tedbirlerniñ keçirilmesi boyunca plan daa muzakere etile, lâkin bazı tedbirler şimdiden belli.
«İşçi gruppanıñ toplaşuvından soñ bütün tedbirler bu afta aydınlatılacaq. Sofiyskaya meydanından Şevçenko bağçasına qadar cayav yürüşi keçirilecek. Resmiy qısım anda olacaq, liderlerimiz Mustafa Cemilev ve Refat Çubarovnıñ çıqışta bulunması beklenile. Yarmalıqnı da teşkil etemiz, avtoyürüşi keçirilecek, soñra camide iftar yapılacaq. 500 insan iştirak etecegini bekleymiz», – dep ayttı Seit-Bekir Suleymanov.
Qırımtatar yaşlar merkeziniñ faalleri iyün 3-ten 26-ğa qadar qırımtatar bayrağı ile flash mobnı teşkil eteler. Teşkilâtçılarnıñ aytqanına köre, qırımtatar bayrağı Ukrainanıñ er bir vilâyet merkezini ziyaret etmeli.
Qırımtatar yaşlar merkeziniñ azası Fevzi Abkadırov bildirdi ki, aktsiya iyün 3-te Kiyevde başladı, bayraq Vinnitsa, Lviv, Lutsk, Çernovtsı ve Dnipropetrovsknı endi ziyaret etti. Nevbetteki noqta – Harkiv.
Faalniñ aytqanına köre, bayraqnı Qırımğa yollaycaq olalar.
Qırımtatar bayrağı kök tamğalı bayraqtır. Qırımtatar bayraq künü 2009 senesi tesis etilgen edi.
