Qırımnıñ Rusiye Devlet şurasınıñ tasil, ilim, gençlik siyaseti ve sport komiteti spiker muavini Remzi İlyasovnıñ tasil aqqında qanun leyhasına cumhuriyette qırımtatarca ve ukrainceniñ mecburiy ögrenilmesini kirsetmek teklifini red etti.
Bu aqqında Qırım Devlet şurasınıñ saytında aytıla.
Beyanatqa binaen, bu mesele komitette faal munaqaşanıñ sebebi oldı, lâkin devamlı muzakerlerden soñ deputatlarnıñ qabul etken qararı böyle – «tüzetme tekliflerini red etip, ana-babalar ve talebelerge cumhuriyetniñ devlet tillerini ögrenmek ya da ögernmemege qarar almaq imkânını bermek».
«Yalıñız bu yol milletlerara amanlıq ve milliy tillerniñ inkişafına imkân berecek», – dep ayttı komitetniñ yolbaşçısı Vladimir Bobkov.
O, milletlerara munasebetler parlament komitetiniñ deputatları ile beraber Qırımda milliy tillerniñ inkişafı boyunca programmanı azırlaycaq işçi gruppanı meydanğa ketirmege teklif etti.
Qırım spikeriniñ muavini Remzi İlyasov Devlet şurasında «Qırım Cumhuriyetinde devlet ve diger tillerniñ qullanması aqqında» qanun leyhasını kirsetken edi. Vesiqağa binaen, qırımtatar ve ukrain tilleri, rus tilinen aynı derecede, cumhuriyetniñ tasil müessiselerinde mecburiy ögrenilmek kerek.
Cemaatçılarnıñ bildirgenine köre, Qırım Rusiye nezaretine keçken soñ yarımada mekteplerinde devlet tilleri aynı seviyede ögrenilmey. Rusça dersleri aftada 5 saat ya da 6 saat olsa, qırımtatarca ya da ukraince fakultativ olaraq ögrenile ya da iç ögrenilmey.
