«Umma» Ukraina Musulmanları Diniy İdaresi Ramadan muqaddes ayınıñ iyün 17 künü küneş batuvından soñ başlaycağı aqqında ilân ete, yani 2015 senesi iyün 18 – orazanıñ ilk künü olaraq sayılacaq.
Bu sebepten, UMDİmatbuat hızmetinde bildirilgeni kibi, iyün 17-de aqşam namazında soñ «Umma» UMDİcamilerinde ilk teravih namazı qılınacaq – oraza ayında qoşma namaz, Ramadan ayı devamında er gece qılına.
Ukraina Müftiyatınıñ beyanatında Ramadan ayı oraza «Ukraina musulmanları içün kene ciddiy sınav olacağı» aqqında bildirile.
«Yalıñız yaz sıcağından ve künniñ uzunlığından (orazanıñ üçte bir qısmı yaz kün donümine kele) degil, amma Rusiye Federatsiyası tarafından Qırım ve Donbass işğali sebebinden. Bundan ğayrı, Ukraina vatandaşlarınıñ er bir din vekilini arbiy istilâdan qorçalağan askerler arasında da musulmanlar bar». – denile beyanatta.
Ukraina Müftiyatınıñ malümatına köre, şimdi musulmanlarnıñ çoqusı göñülli areketlerde de iştirak ete.
«Şunıñ içün oraza musulmanlar içün yalıñız ruhiy temizlev, Allahqa yaqınlaşuv vaqtı degil de, Vatan qoruvına bağışlanğan faal areket ve mecburen köçip kelgenlerge yardım kösterüv vaqtı olur. Ramadan yasaqlanğan dört aydan biri ola, şu zamanda arbiy areketlerni alıp barmağa mümkün degil. Amma işbu yasaq arbiy istilâğa qarşılıq kösterüvge tesir etmey, çünki öz toprağını qorumaq – er bir musulmannıñ mecburiyetidir», – deyler UMDİ de.
Ramadan muqaddes ayı devamında musulmanlar oraza tutmalı, yani kündüz aş ve suvdan vazgeçmeli. Orazadan ağırayaqlı ve emizdirgen qadınlar, yedi yaşqa yetmegen balalar, hasta ve qart insanlar, seyahatçılar boşatıla.
Evel bildirilgeni kibi, «Ukraina musulmanları Assotsiatsiyası» cemaat teşkilâtı «Qırımtatar cemiyeti» (Kiyev) ile birlikte Ramadan ayında Quran ezberlevi boyunca yarış keçirecektirler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
