Link açıqlığı

Kiyevde iyün 17 künü «Yolçıq» leyhası başlana. Maqsadı – ukrain şeerlerini ukrain ve qırımtatar örnek, timsalleri ile birleştirmek. Negiz olaraq qırımtatar ustası Rustem Skibinniñ işleri alınğan.

Leyha müellifleri deyler ki, tedbirge er bir ukrain şeeri içün ayrı «yolçıq» variantlarını işlep çıqarğan ukrain ve leh ressamları qoşuldı. Leyha amelge keçirilecek birinci şeerler Kiyev, Vinnitsa ve Çernovtsı olacaqtır.

«Yolçıq» leyhası Qırım mevzusını cemaat diqqatı alanında tutmaq içün teşkil etilgnedir. Qıtaiy Ukraina ve Qırım arasında bağnıñ saqlanılması da ğayet müim bir şeydir. Şimdi Qırımda olğan basqı şaraitlerinde sanat böyle bağnı saqlaycaq imkânlardan biri ola», – deyler leyha müellifleri.

İyün 17 kününden Kiyevde Poloniya soqaq ressamı Artur Vabik işleycek. O, Goloseyev caddesinde köpür astında «yolçıqnı» etmege başlaycaq. Leyha müellifleri aytqanı kibi, negiz olaraq Rustem Skibinniñ mimarcılıq ile bağlı örnekleri alınğan. Ressam olarnıñ yardımı ile «Qırım adetleri ve büyük şeerniñ zemaneviy meyillerini birleştirgen bir alannı yaratacaq».

«Vinnitsada «yolçıq» Mihail Kotsübınskıynıñ Bağçasaray aqqında yazğan metn parçalarından ibaret olacaq. Ressamlar sözlerini, qırımtatar, yunan ve qaraylarnıñ örnekleri ile birleştirip, tsitata ketirecekler», – deyler leyha müellifleri.

Çervnotsı şeerinde «yolçıq» Türk köpründen Türk quyu ile meydanına kelecek.

Teşkilâtçılarnıñ aytqanı kibi, «yolçıq» Ukrainanıñ diger şeerlerinden ve onıñ tışından da keçip, er yerde Qırım aqqında hatırlatacaq izni qaldıra bile.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG