Cumaaqşamı künü, iyün 18-de, Or Qapı rayonınıñ mahkemesi aqımdaki seneniñ mayıs 18-de mitingni teşkil etken Saniye Ametovanı memuriy mesüliyetke çekecek. Bunı Qırımtatar Milliy Qurultayı Merkeziy saylav komissiyasınıñ reisi Zair Smedlâyev Facebookta bildirdi.
«Añlağanıma köre, miting keçirilmesini muzakere etken, soñra ise onıñ şeklini deñiştirgenler onıñ saqat oğlunı baqmaq içün alğan nefaqası çoq olğanını tüşüneler», – dep yazdı Smedlâyev içtimaiy ağda.
Yıl-yıldan Qırımda sürgünlik künü munasebetinen tedbirler, şu cümleden Qırım paytahtınıñ merkezinde matem mitingi keçirile edi. 2014 senesi mart ayında Rusiye yarımadanı işğal etken soñ Aqmescitniñ merkezinde bunıñ kibi tedbirlerniñ keçirilmesini yasaq ettiler. Bu sene de Qırımtatar Milliy Meclisi izin alıp olamadı.
Mayıs 18 künü – Qırımtatar halqı sürgünliginiñ hatıra künü. Bu kün 1944 senesi qırımtatarlarnen tolu birinci eşelon Orta Asiyağa yollandı. Umumen 180 biñ insandan ziyade sürgün etilgen edi.
