Cumaertesi künü Kiyev civarındaki Vasilkov rayonında cermay bazasında kene yanğın başladı, dep haber ete fevqulâde vaziyetler Devlet hızmeti.
24 insan ve dört avtotsisterna yanğınnı söndüreler.
Vasilkov şeeriniñ yolbaşçısı Sergey Sabov Facebook saifesinde bildirdi ki, eali içün telüke yoq.
«Bugün saat 11.30-da BRSM savutı yanmağa başladı. Kimse zarar körmedi. Vasilkov ealisi içün telüke yoq. Fevqulâde vaziyetler hızmeti savutnı suvuta. Yel tumannı Glevaha ve Kiyev tarafına alıp kete», – dep yazdı o.
Malüm olğanı kibi, cumaertesi künü, iyün 13-te, cermay bazası kene yanmağa başladı.
İyün 8-de yanğın yüz bergen edi, beş kişi elâk oldı ve 15 insan yaralandı.
