Link açıqlığı

Rostov-na-Donu şeerinde belgisiz şahıslar Ukraina konsullığına ücüm ettiler


Rostov-na-Donu şeerinde belgisiz şahıslar Ukraina konsullığına ücüm ettiler

Rusiyeniñ Rostov-na-Donu şeerinde cumaertesine keçer gecesi Ukrainanıñ Baş konsullığına ücüm etildi, dep bildirdi yerli Qanun çıqarıcı meclisniñ deputatı Yekaterina Stenâkina Twitter saifesinde.

«Rostovda belgisiz şahıslar Ukraina baş konsullığına ücüm ettiler. Mence, provokatorlar. Rostov vilâyetinde Ukraina vatandaşları pek çoq. Bir şeyge baqmadan, Rostov Ukraina baş konsullığına ücüm etkenler qanunğa köre cezalanmalı. Rusiyede mahkemesiz ceza berilmez», – dep yazdı deputat.

«Gorodskoy reporter» yerli neşiriniñ bildirgenine köre, diplomatik missiyanıñ binasına yımırta ve zelenkanı attılar. Rostov politsiyasınıñ malümatına köre, tahminen yüz kişi ücüm etti, ve olarnı yaqalamadılar.

Rostov vilâyetiniñ İçki işler nazirligi baş idaresiniñ matbuat hızmeti bildire ki, binağa yımırta, maden şeyler, zelenka tolu şişeler atıldı.

«Nizamnı bozğanlar saqlandılar. Olarnı qıdıralar», – dep bildire matbuat hızmeti.

Rostov-na-Donu şeerindeki Ukraina konsulı Aleksandr Kovtun RİA «Novosti» agentligine bildirdi ki, vaqia iyün 13-te gece saat birlerde olıp keçti.

Ukraina Tış işer nazirliginiñ resmiy cevabı daa yoq.

Cumaaqşamı künü, iyün 11-de, Harkovda belgisiz şahıslar Rusiye Federatsiyasınıñ Baş konsullığına yımırta ve boyanı attılar.​

XS
SM
MD
LG