Link açıqlığı

Aqmescitte cuma künü, iyün 12-de, «Krımskaya gazeta» ükümet neşiriniñ beş biñ nushasını tarqattılar. Qırım haber nazirligi bildirdi ki, gazetalarnı «qırımlılarnı haberdar etmek içün» Rusiye Künü munasebetinen tarqattılar.

Berilgen malümatqa köre, Qırım federal universitetiniñ studentlerini gazetalarnı tarqatmağa davet ettiler.

«Tedbir devamında er bir kişi viktorinada iştirak ete ve üç sualge cevap bere bildi. Ğaliplerge bahşışlar ve bir yıllıq gazeta abunesi berildi», – dep aytıla haberde.

Aktsiya Karl Marks soqağında başlap «Aqmescit» kinoteatri yanında yekünlendi. «Krımskaya gazeta» neşiriniñ baş muarriri Mariya Volkonskaya iştirakçiler ve ğaliplerni tebrikledi.

Cuma künü Qırımda Rusiye devlet bayramı – Rusiye kününi qayd eteler. İyün 12 künü tatil ilân etildi, bayram tedbirleri bazar kününe qadar keçirilecek.

Rusiye bayramı munasebetinen Qırımda bir sıra tedbir keçirilecek. Aqmescitniñ Lenin meydanında saat 17:30-da bayram programması ötkerilecek. «Rusiye, bizler – seniñ balalarımız» programmasında şeer ve rayonnıñ icadiy taqımları, balalar içün yarış-oyun programmaları keçirilecek, Aqyar ve Qırımnıñ diger şeerlerinde de kontsert programması ötkerilecek.

1992 senesi iyün 12-de Rusiye Federatsiyasınıñ halq deputatları Devlet mustaqilligi aqqında deklaratsiyanı qabul ettiler.

1992 senesi iyün 11-de Rusiye Federatsiyasınıñ Yuqarı Şurası iyün 12-ni bayram olaraq tanımağa qarar aldı.

XS
SM
MD
LG