Ukraina Baş prokuraturası yanındaki Qırım Muhtar Cumhuriyetiniñ prokuraturası Qırımnıñ şimdiki akimiyeti tarafından jurnalist faaliyetine keder etilgeninden sebep cinaiy taqiqatqa başladı.
Bu aqqında QMC prokuraturasınıñ saytında aytıla.
Aprel ayınıñ soñunda Ukraina haber siyaseti naziriniñ mesleatçısı Sergey Kostinskiy bunıñ ile bağlı arizanı prokuraturağa bergen edi.
Kostinskiyniñ arizasında Qırımda jurnalistlerni taqip etüv aqqında aytıla edi. Bundan ğayrı, «Tsentr jurnalistskih rassledovaniy» agentliginiñ sabıq muarrirleri Natalya Kokorina ve Anna Şaydurovanıñ evinde keçirilgen tintüv ve sorğular aqqında aytıldı. Federal havfsızlıq hızmetiniñ (FSB) Qırım idaresi Rusiye Cinaiy kodeksiniñ 280.1 maddesi boyunca «Qırım» batalyonınıñ göñüllileri aqqında maqaleden sebep cinaiy işni açtı. ATR qırımtatar telekanalınıñ operator Eskender Nebiyevni ise 2014 senesi fevral 26-da olıp keçken mitingde iştirak etkeninde qabaatlaylar.
Amerikanıñ jurnalistlerni qoruv komiteti Rusiye prezidenti Vladimir Putinni Qırımda matbuat serbestligini sıqıştıruv areketlerini toqtatmağa çağırdı.
Bundan evel Freedom House ükümetten tış teşkilâtı Rusiye tarafından işğal etilgen Qırım matbuat serbestliginiñ seviyesi boyunca dünyanıñ eñ yarımay memleketleri ve topraqları cedveliniñ onuna kirgenini bildirdi. Bu cedvelde yarımada Aqrusiye, İran, Turkmenistan ve Özbekistannıñ yanında qayd etile.
