Aqmescitte, iyün 12-de, Rusiye Künü çerçivesinde «halq imayecileri»ni tantanalı sürette taqdirlediler, haber ete Qırım.Aqiqat.
«Qırım qaytarıluvı içün» Rusiye Mudafaa nazirliginiñ mukâfat ve medallerini tahminen 300 «imayeci» elde etti. Akimiyetni tedbirde Qırımnıñ rusiyeli başınıñ birinci muavini Mihail Şeremet temsil etti.
«Memleketiimiz yekânedir, onı yıqmağa imkân yoq, halqımız tiz çökmedi ve çökmez. Din ve içtimaiy statusqa baqmadan, birliktemiz», – dedi o.
Qırım «halq imayesiniñ» vekillerini yarımada işğalinden sebep endi bir qaç sefer taqdirlegen ediler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
