Link açıqlığı

Ukraina halq deputatı, qırımtatarlarnıñ yetekçisi Mustafa Cemilev oğlu Hayser Cemilevge nisbeten çıqarılğan Krasnodar mahkemesiniñ qararı qanunsız olğanını ve Rusiye Hayserni beş yıl reine olaraq tutmağa istegeni aqta bildire. Bunı Cemilev Qırım.Aqiqat mühbirine ayttı.

«Üküm, tabiiy ki, qanunsızdır, çünki Rusiye territoriyasında ve Rusiye qanunlarına köre üküm çıqarmaq içün aqları yoqtır. Cinayet Ukrainada, ukraina vatandaşı tarafından, Ukraina vatandaşına nisbeten yapılğan edi. Mahkemeci olmağanlarğa iddialarım yoq, reineniñ taqdirini qurtamaq içün bütün zaruriy areketlerni etkenler. Amma Rusiye oğlumnı beş yıl reine olaraq tutmağa qarar aldı. Rusiye qanuniyetine de ters kele», – dey Mustafa Cemilev.

Bundan da ğayrı, Rusiyede çıqarılğan üküm İnsan aqları boyunca Avropa mahkemesi qararına ters kelgenini de qayd etti. Qararğa köre, mabüsni Ukrainağa teslim etmek kerekler.

«Tış işler Nazirligine onıñ qaytarılması aqta mektüp yollanılğan edi, amma Rusiye bunı red etti», – dey qırımtatarlarnıñ yetekçisi.

Qırım.Aqiqat bildirgeni kibi, Krasnodar ülkesiniñ mahkemesi çarşenbe künü, iyün 10-da, Ukraina Yuqarı Radasınıñ deputatı Mustafa Cemilevniñ oğlu Hayserni beş yılğa qadar umumiy nizam apishanesine almaq qararını qabul etti.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

XS
SM
MD
LG