Link açıqlığı

Qırımtatarlar ukrain musulmanları ile Ramadan ayında Quran bilgisi boyunca yarışnı keçirecekler


«Ukraina musulmanları birligi» cemaat teşkilâtı «Qırımtatarlarnıñ cemiyeti» (Kiyev) ile birlikte Ramadan ayında Quran bilgisi boyunca yarışnı keçirecekler. Bunı Qırım.Aqiqatqa Birlikniñ imamı, Qırımdan çıqqan Elimdar Hayrullayev bildirdi.

«Bu aynıñ (Ramadan) 27 künü erkeklerni, 28 – qadınlarnı diñleycekmiz. Bunı medeniy merkezimizde yapmağa planlaştıramız»,– dedi imam.

İştirakçiler Qurannıñ qısqa surelerden ibaret olğan soñ cuzınıñ bilgisine yarışacaqlar. İmamnıñ fikrine köre, Ukrainada musulmanlarnıñ Muqaddes Kitapnıñ bilüv seviyesi daa büyük degil, onıñ içün şimdi qıyın vazifelerni qoymaq kerekmey.

«Ukrainada Quran tögerekleri zayıf, az olğanından sebep cemiyet Qurannı pek ögrenmey. İnsanlarnıñ imkânlarını tüşünip, soñ cuznı sayladıq, başta ise yarışnı soñ üç cuznıñ esasında keçirmek niyetinde edik. İştirakçilerge nevbetteki kriteriylerge köre qıymet kesecekler: ezberden bilüv, er angi yerden, telâffuz. Qurannıñ añlavı boyunca soramaq kibi ğaye bar edi, amma balalarnıñ iştirak etecegini ve iştirakçiler arasında araplarnıñ olmağanını nazarğa alıp, bu ğayeden vazgeçtiler» , – dedi Hayrullayev.

Aynı zamanda Quran ögrenilmesine meraq arta, – dey imam. Cemiyette 10-12 yaşında balalar bar, üç-dört cuznı ezberden bileler.

Yarış ğalibi 10 biñ grivna miqdarında mukâfatnı alacaq, ekinci yerde – beş biñ, 3-ünci – eki biñ grivna. Mukâfatlarnı iyül 17 künü berecek olalar.

Oraza ayı Qurannı oqumaq – musulmanlar içün adetiy arekettir. Qurannıñ metni 30 tahminiy qısımğa bölüne ve Ramadan ayı devamında ögrenile. Bu sene Ramadan ayı iyün 18 künü başlana. Oraza bayramı iyül 17 kününe kele.

XS
SM
MD
LG