Link açıqlığı

Saatnıñ esas haberi

Mahküm etilgen Hayser Cemilevniñ anası: Rusiye ükmüni seslendirgende tuvğanlarını davet etmediler


Safinar Cemileva
Safinar Cemileva

Ukraina Yuqarı Radasınıñ deputatı Mustafa Cemilevniñ oğlu Hayserniñ tuvğanları ve yaqınları aytqanlarına köre, olarğa mahkeme ükmü seslendirilecek vaqıtnı haber etmediler. İyün 10-da Krasnodar ülkesiniñ mahkemesi Hayser Cemilevni beş yılğa qadar azatlıqtan marum qaldırdı.

Bunı Mustafa Cemilevniñ ömür arqadaşı, Hayserniñ anası, Safinar Cemileva Qırım.Aqiqatqa bildirdi.

Onıñ aytqanına köre, o, mahkemege baracaq edi, lâkin tuvğanlarını ükümni seslendirgende davet etmediler.

«Biz Qırımda edik. Adliyeciniñ de haberi yoq edi: bu kün üküm çıqarılacaqmı-yoqmı belli degil edi. Oña da aytmadılar: olar toplaşuv odasına çıqıp ükümni çıqardılar. Bu sebepten mahkemede Hayserniñ soy-soplarından kimse yoq edi», – dep ayttı Safinar Cemileva.

Qadın mahkeme qararına şaştı.

«Qanunğa köre, qabaatnıñ esas maddesi (diqqatsızlıqtan öldürüv – muar.) boyunca eki yılğa qadar azatlıqtan marum etseler, diger madde boyunca ceza olmamalı», – dep qayd etti o.

Cemilevanıñ aytqanına köre, oğlunı silâ hırsızlığında da qabaatladılar.

«Öz evinde hırsızlıqmı olur? O, silânı izinsiz aldı, ariza yoq edi», – dedi o.

Qadınnıñ fikirince, mahkeme esnası «bir çoq hata» ile yapıldı.

«Rusiye uquq qoruyıcı organları bu iş boyundca mahkeme iznini almayıp taqiqatqa başladılar. Bu işni tekrar taqiq etmege kim emir etti? Mahkeme qarar almaq kerek», – dedi o.

Onıñ qayd etkenine köre, mahkeme qararından şikâyet etecekler. O, Hayser Ukrainağa berilecegine ümüt ete.

Qırım.Aqiqat bildirgeni kibi, Krasnodar ülkesiniñ mahkemesi çarşenbe künü, iyün 10-da, Ukraina Yuqarı Radasınıñ deputatı Mustafa Cemilevniñ oğlu Hayserni beş yılğa qadar umumiy nizam apishanesine almaq qararını qabul etti.

Devlet qabaatlayıcısı Svetlana Nekoz Hayser Cemilevge 5,5 yıllıq apis cezasını bermege teklif etken edi. Advokat Nikolay Polozovnıñ sözlerine köre, Cemilev böyle qattı cezasını qazanmadı. Em de cezasını Rusiyede degil, Ukrainada körmeli.

İyün 2 künü Krasnodar mahkemesinde mahkemeci olmağanlar maqsatlı öldürüvde qabaatlanğan Hayser Cemilevni aqladılar. Ömür cezasını belgilegen öldürüv qabaatı lâğu etildi. Cemilevniñ imayesi qarardan memnün qaldı.

Hayser Cemilevni 2013 senesi mayıs 27-de onıñ Bağçasaraydaki evinde yaqaladılar. Anda 44 yaşında Fevzi Edemov öldürilgen edi. Militsiya Cinaiy kodeksniñ 115-inci maddesiniñ 1-inci qısmı boyunca (planlaştırılğan öldürüv) cinaiy iş açtı.

Aqmescitniñ Kiyev rayon mahkemesi Hayser Cemilevni apiske aldı. Qırım işğalinden soñ taqiqat organları bu işni ğayrıdan taqiq etmege qarar berdiler. Hayserni Qırım SİZOsından Krasnodar ülkesine alıp kettiler.

Hayser Cemilev qabaatını tanımay. Adliyecisi öldürüv diqqasızlıqtan sebep olğanını bildire. Kiyevniñ Apellâtsion mahkemesi ise Hayser diqqatsızlıqtan cinayet yaptı qararına kelip, onı azat etmege qarar aldı. İnsan aqları Avropa mahkemesi de Hayser Cemilevniñ azat etilmesi aqqında qararnı qabul etti. Lâkin Rusiye onı yerine ketirmey.

XS
SM
MD
LG