Aqmescitniñ şeer memuriyeti iyün 10-da üyleden soñ yağğan sağanaqlarnıñ aqibetleri aqqında bildire. Hızmetniñ malümatına köre, şeerniñ mesken yerlerinden biri ve bala bağçasını suv bastı.
«Belediye müessiseleriniñ hadimleri Aqmescit şeerinde suv basqan yerlerni baqmağa çıqqan ediler», – aytıla haberde.
Memuriyetniñ bildirgenine köre, mütehassıslarnıñ yardımı Lugovaya soqağı ve oña yaqın yerleşken yerlerge kerek oldı, qazaiy hızmetler Bespalov soqağındaki «Malinka» №62 bala bağçasını qurtardılar.
«Sağanaqlar neticesinde mağazanı suv bastı, mında podstantsiya yerleşe, felâket çıqar edi. Qazaiy hızmetler suvnı çıqarmağa başladılar», – dep aytıla beyanatta.
Qırım.Aqiqat bildirgeni kibi, iyün 9-da aqşam yağğan sağanaq neticesinde Aqmescitniñ merkezi suvğa battı, yollar tam bir özenlerge çevirildi, aydavcılar maşinalarnı taşlap ketmege mecbur ediler.
Küçlü yağmurdan soñ bazı yollarnıñ asfalti yoq oldı.
Qırımnıñ şimdiki yolbaşçısı Sergey Aksenov iyün 10-da bergen malümatına köre, yaqın vaqıtta şeerniñ sağanaq kanalizatsiyasını tüzetmek imkânsız. O, kommunal hızmetlerniñ keyfiyetsiz işini qayd etti.
Aksenov mal-mülki zarar körgen sakinlerden afu soradı.
