Çarşenbe künü, iyün 10-da, Vinnitsada «Epimiz – qırımtatarmız» flash mobı olıp keçti. Onıñ teşebbüsçisi Qırımtatar yaşlar merkeziniñ Kiyev bölügi oldı. Yerli sakinler qırımtatar bayrağı ile şeerniñ merkezinde yurdiler, dep bildire ilikenews portalı.
Neşirniñ malümatına köre, tedbir Vinnitsanıñ Studentler parlamenti tarafından teşkil etildi ve vilâyet devlet memuriyetiniñ qoranta, gençlik ve sport işleri idaresiniñ yardımı ile keçirildi.
«Lâqayt qalmağan insanlarnıñ sayesinde keçirilgen flash mob qırımtatar halqına qoltutqanımıznı ifadeley. Bu Qırımtatar bayraq kününe bağışlanğan Bütünukrain aktsiyasıdır. Bizler vaqtınca işğal etilgen Qırımda yaşağan insanlarğa olarnı aqılımızda tutqanımıznı köstermek isteymiz», – dep ayttı Ukraina prezidentiniñ qırımtatar halqı işlerinden vekâletlisiniñ faaliyetini teminlev bölüginiñ müdiri Arsen Jumadilov.
Kiyevde iyün 3-te flash mob başladı. Onıñ maqsadı – qırımtatar bayrağını Ukraina şeerlerinden alıp ketip, qırımlılarğa birdemlik timsali olaraq bermektir.
Yarımadada Bayraq kününi iyün 26-da qayd etmege planlaştıralar. Aqmescit şeeriniñ memuriyeti teşkilâtçılarğa Qırımtatar bayraq kününi qayd etilgen yerde keçirmege izin bermedi. Faal qırımtatar gençlerinden ibaret olğan teşkiliy komitet Aqmescit memuriyetine tekrar ariza berip, iyün 27-de Borçoqraq mikrorayonında Qırımtatar bayraq kününi keçirmek ruhsetini almaq istey.
Qırımtatar bayrağı kök tamğalı bayraqtır. Qırımtatar bayraq künü 2009 senesi tesis etilgen edi.
