Aqmescitte yağğan küçlü yağanaqlar neticesinde Qırım paytahtınıñ bir sıra soqağı suv altında qaldı.
Qırım.Aqiqat mühbiri bildire ki,yollar tamir etilecek yerlerde aydavcılar çuqurlarğa tüşeler, çünki olarnı suv qapata. Aynı böyle vaziyetni 1 Konnoy Armii soqağında körmek mümkün edi.
Mında birden eki maşina çuqurğa tüşti. Diger maşinalarnıñ aydavcıları ve qomşu evlerniñ sakinleri taşlarnı ketirip maşinalarnı çıqarmağa yardım ettiler.
Maşinalarnıñ saipleri yollarnıñ vaziyetine açuvlanalar, em de şeerni bunıñ kibi furtunalarğa azırlamağan kommunal hızmetlerni sögeler.
Qırım.Aqiqat bildirgeni kibi, iyün 9-da aqşam yağğan sağanaq neticesinde Aqmescitniñ merkezi suvğa battı, yollar tam bir özenlerge çevirildi, aydavcılar maşinalarnı taşlap ketmege mecbur ediler.
Küçlü yağmurdan soñ bazı yollarnıñ asfalti yoq oldı.
Qırımnıñ şimdiki yolbaşçısı Sergey Aksenov iyün 10-da bergen malümatına köre, yaqın vaqıtta şeerniñ sağanaq kanalizatsiyasını tüzetmek imkânsız. O, kommunal hızmetlerniñ keyfiyetsiz işini qayd etti.
Aksenov mal-mülki zarar körgen sakinlerden afu soradı.
