Kiyevniñ apellâtsion mahkemesi çarşenbe künü, iyün 10-da, Rusiye mahsus bölüginiñ askeri Yevgeniy Yerofeyevniñ apis cezasını lâğu etmek muracaatını red etti. Bunı Radio Svoboda bildire.
Yerofeyev mahkeme zalında bulundı, dep ayttı onıñ adliyecisi Oksana Sokolovskaya.
Yerofeyevni Rusiyeniñ daa bir askeri Aleksandr Aleksandrov ile beraber ukrain arbiyleri Donbassta mayıs ayınıñ ortasında yaqaladılar. Ukraina akimiyetiniñ malümatına köre, olar sorğuda Rusiye Baş istihbarat idaresiniñ Tolyatti brigadasınıñ askerleri olğanını ayttılar. Rusiye Mudafaa nazirligi bunı red etip, olarnıñ orduğa iç bir alâqası yoq, çünki dekabr ayında hızmetleri bitti, dep israr ete.
Yaqalanğan eki kişi Rusiyeniñ «Novaya gazeta» neşirine intervyü berip, Rusiye Silâlı quvetlerinden ketmegenlerini bildirdiler.
Ukrainada yaqalanğan Rusiye askerlerini terroristik faaliyette şekleyler.
Mayıs 22-de Kiyev Şevçenko rayonınıñ mahkemesi Aleksandrov ve Yerofeyevni 2015 senesi iyül 19-ğa qadar apiske aldı.
