Rusiyeniñ Qırım işğali belli bir maqsat ile yapıldı: Qara deñiz regionını nezaret etmek içün yarımadanı arbiy bazağa çevirmek isteyler, dep ayttı Latviya Avropa deputatı Sandra Kalniete.
«Halqara toplulıq Rusiye küç ile deñiştirgen Avropa sıñırlarını qabul etmez. Putin ve Rusiye qıyın vaziyetke oğraylar. Olarnıñ arbiy bazaları olur, amma Avropa Birligi ile strategik işbirligi artıq olmaz», – dep ayta Kalniete.
O, emin ki, Qırım Ukrainağa qaytarılacaq. «Ne vaqıt kimse aytıp olamay, lâkin men eminim: bir kün kelir ve Qırım Ukrainağa qaytacaq», – dep ayttı o.
Kalniete tenqit beyanatlarından sebep Rusiyege kirişi yasaq etilgen siyasetçilerniñ «qara cedveline» kire.
İyün 10-da Avropa parlamentinde Rusiyeniñ Qırım işğalinden soñ onıñ arbiyleştirüvini muzakere etecekler. Bu meselede Romaniyadan Avropa deputatı İvon Mirça Paşku esabat ile çıqışta bulunacaq.
Qırım işğali ve Moskvanıñ Donbassta Rusiyege qoltutqan boyeviklerge köstregen yardımı sebebinden Ğarp memleketleri Rusiye ve şirketlerine, em de Qırımnıñ şimdiki akimiyetiniñ vekillerine qarşı ceza kirsettiler.
