İyün 6-7 künleri Gdansk şeerinde (Poloniya) qırımtatar medeniyeti festivalinde iştirak etken «Nefes» qırımtatar ansambliniñ oyuncları belli bir müddetke Poloniyada qalıp raatlanmağa imkânını qazandılar.
Ansamblni Legionovo şeeriniñ yerli idaresi ve «Fundatsiya Krım» hayriye teşkilâtı davet etti. Ziyaret Qırımtatar Milliy Meclisiniñ yardımı ile teşkil etildi.
«Fundatsiyanıñ» vekili Alime Asanova Qırım.Aqiqat mühbirine bildirdi ki, teşkilât Qırım ve ATO yerlerinden köçip kelgen, em de Qırımda yaşamağa qalğan balalar içün Poloniyada raatlıqnı teşkil ete. Onıñ malümatına köre, bu seneniñ başından itibaren Poloniyanı 30 bala ve «Nefes» qırımtatar ansambliniñ 16 iştirakçisi ziyaret etti.
«Bunıñ kibi ziyaretlerniñ esas maqsadı – Avropa ile içtimaiy medeniy bağlarnıñ pekitilmesi. Balalar onı daa yahşı bilsin ve «yaramay Avropa» efsanelerine inanmasınlar dep. Ziyaretler daa da faydalı keçsin dep, yüksek sınıf talebeleri ve mektep mezunlarını, em de birinci kurs studentlerini almağa tırışamız», – dep qayd etti Asanova.
Onıñ qayd etkenine köre, Legionovo şeerinde balalar yahşı raatlanalar, em de ara-sıra memleketniñ diger şeerlerinde keçirilgen festivallerde iştirak eteler.
Qırım.Aqiqat bildirgeni kibi, Poloniyanıñ Gdansk şeerinde keçken raatlıq künleri qırımtatar medeniyeti ve sanatı festivali keçirildi, yerli sakinler qırımtatar halqınıñ medeniyeti ve sanatınen tanış oldılar.
