Qırımğa iyün 9 künü tüşken küçlü sağanaq aqiqiy felâketniñ sebebi oldı. Yarımada şeerleriniñ soqaq ve rayonlarında qırımlılarnıñ çoqusı suvğa battı, Qırım paytahtınıñ mikrorayonlarında aqşamğa qadar elektrik teminlevi yoq edi, haber ete Qırım.Aqiqat.
Hususan, küçlü yağanaq sebebinden Aqmescit zarar kördi. Bazı rayonlarda suv insanlarnıñ bellerine qadar yete edi. Qırım paytahtı yollarında büyük tıqanıqlıqlar peyda olğan edi. Şeerniñ bir çeеtinden başqasına yetmek içün bir buçuq-eki saat sarf etmege kerek edi. Aydavcılarnıñ bazıları suvnı maşinalarından qopqalarnen alıp töke edi.
Qırım Fevqulâde işler Nazirliginden tenbiye iyün 9 künü aqşamğa yaqın peyda oldı. İyün 10 kününe Qırım Fevqulâde işler Nazirliginiñ saytında felâket aqibetleri aqta resmiy malümat yoqtır.
İnternet qullanıcıları faal sürette içtimaiy ağlarğa felâket fotolarını yükleyler.
Salı künü, iyün 9-da, sağanaqtan sebep soqaqlar suvğa battı. Bazı yerlerde gölçikler peyda oldı. Qırım paytahtınıñ sağanaq tertibatı suv aqımı ile küreşip olamay. Aydavcılar maşinalarını battırmaq havfından arabalarını qaldırmağa mecbur oldılar.
Aqmescit şeer memuriyeti saytında bildirilgeni kibi, iyün 10 künü yağmur, burçaq, ruzgâr beklenile.
