Link açıqlığı

Qırımtatar Milliy Meclis reisi Refat Çubarov Qırımda Rusiye akimiyeti tarafından teşkil etilgen yañı qırımtatar teleradiokompaniyası «yarımada işğaliceleriniñ yañı teşviqat aleti olacağını» bildirdi.

«Olar işğal etilgen Qırımnıñ qanunsız akimiyeti tarafından kontrol etilecek şirketni meydanğa ketireler», – dey Çubarov Radіo Svobodağa.

«Yañı, aytqanları kibi, «cemaat» teleradiokorporatsiyanı teşkil etmege söz bereler. Amma o tam şekilde Milletler işleri boyunca komitet tarafından kontrol etilecek. Devlet tarafından nezaret etilecek şirketten ne beklemek kerek?», – dedi Çubarov.

Evel, salı künü, iyün 9-da, Qırım.Aqiqat Qırım nazirler Şurası «Cemaat qırımtatar teleradiokompaniyası» muhtar teşkilâtını meydanğa ketirgeni aqta bildirgen edi.

Telekanal tesisçisi – Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca «Devlet komiteti» oldı.

Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.

XS
SM
MD
LG