Qırım «halq imayesi»niñ Rusiye Mudafaa nazirligi ve Qırımnıñ Rusiyeli başı Sergey Aksenov tarafından medallernen mukâfatlandıruv merasimi Aqmescitte üküm sürgen ava şaraitlerinden sebep belgisiz müddetke keçirile, – haber ete Qırım.Aqiqat.
Mukâfatlandıruv tedbiri başqa künge keçirilgeni aqta iyün 9 künü Qırım «halq imayesiniñ» matbuat hızmeti bildire.
«Ava şaraitleri fena olğanından seber mukâfatlandıruv tedbiri belgisiz müddetke keçirile», – denile beyanatta.
Aqmescitte iyün 10 künü Belgisiz asker mezarı yanında Qırımnıñ «halq imayesi» vekillerini Rusiye Mudafaa Nazirligi ve Qırımnıñ Rusiye başı Sergey Aksenov tarafından ayırılğan medallernen taqdirleycek ediler.
«Halq imayecilerine» «Qırım qaytarıluvı içün» ve «Qırımnıñ qoruvı içün» medallerini berecek ediler.
Qırım «halq imayesiniñ» vekillerini yarımada işğalinden sebep endi bir qaç sefer taqdirlegen ediler.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
