Link açıqlığı

Ukrain cemaatçıları «Qırımda siyasiy taqipler hronikası»nı işlep çıqardılar


«YevromaydanSOS» teşebbüsi «Qırım.İşğal hronikası» er aylıq esabatını taqdim etti. Mında yarımadada sorğu, yaqalav, sahte mahkeme toplaşuvlarınıñ hronologik tasviri aydınlatıla.

Teşkilâtta qayd etilgeni kibi, hronikanıñ birinci basması yarımada sakinleri baarde yaşağan «olduqça hoşsuz vaziyetni» köstere.

«Hronikanıñ azırlanılması içün sebeplerden biri – halqara toplulıqnıñ Qırımda işğalniñ bir yılından soñ vaziyet tınç degen hayalıdır. Diger taraftan – «Qırım – Ukraina» ibaresini boş laf olaraq tanımağan qırımlılarnıñ ağırlı duyuşları oldı, qıtaiy Ukraina ise Donbass cenkinden sebep olarğa qulaq asmay», – dey «YevromaydanSOS» koordinatorı Aleksandra Matviyçuk.

«Krım SOS» göñülli teşkilâtınıñ koordinatorı Tamila Taşeva Qırım sualini cemaat diqqatı alanında tutmağa çağırdı.

«Qırımda arbiy areketler olmağanına baqmadan, anda Ukraina vatandaşları ile ilân etilmegen cenk keçirile. Şunıñ içün ukrain devleti ve halqara cemaatçılıq işğal etilgen territoriyalarda qırımlılarnıñ aqlarını qorumaq içün imkânlarnı tapmalı», – dey Taşeva.

Esabatta ayırım qurbanları olğan qırımtatar halqınıñ temsilcilerine de mahsus diqqat ayırıla.

«Biz halqara mütehassıslarnı «zulumğa oğrağan halqlar» añlamını işlep çıqarmaq ve qırımtatarlarğa bu statusnı bermege çağıramız. Al-azırda Rusiye devlet maşinası Qırımda qırımtatarlarğa nisbeten yañı cinaiy işlerniñ açılması içün şaraitlerni meydanğa ketirmege devam ete. Böyleliknen, Rusiye ayırımnı devam ete», – dey Qırımtatar halqınıñ aq-uquqlarını qorçalav komitetiniñ koordinatorı Eskender Bariyev.

İnsan aqlarınıñ bozuluvı ve Qırımda söz serbestligine etilgen basqı aqqında halqara uquq qoruyıcı teşkilâtlar defalarca aytqan edi. Qırımda Rusiye akimiyeti bu bildirüvlerni abartılğan olaraq adlay.

XS
SM
MD
LG