Qırımnıñ Rusiye Nazirler şurası iyün 9-da olıp keçken toplaşuvda «Cemaat qırımtatar teleradiokompaniyası» (CQT) muhtar ticariy olmağan teşkilâtını qurdı, dep haber ete Qırım.Aqiqat.
Telekanalnıñ tesisçisi olaraq Qırım ükümetiniñ Milletlerara munasebetler ve sürgün olunğan grajdanlarnıñ işleri boyunca devlet komiteti tayinlendi.
«Ükümetnen (Rusiye – muar.) laf ettik, para – 177 million ruble – ayırıldı. Cemaat qırımtatar televideniyesiniñ meydanğa ketirilmesi – Bağ ve malümat Nazirligi içün birinci vazife», – dep ayttı Qırımnıñ Rusiye yolbaşçısı Sergey Aksenov.
Toplaşuvda qayd etkenleri kibi, telekanalğa bina berildi, izin instantsiyaları – uquq añlaşmalarını bekley.
«Er şey muzakere etildi. Kozlov soqağındaki (Aqmescit ş.) matbuat merkezimizde yer ayırdıq, izin instantsiyaları ile laf ettik – anda müessiseniñ qurulması aqqında uquqiy haberni bekleyler», – dep ayttı Qırım Haber naziri Dmitriy Polonskiy.
Aksenovnıñ aytqanına köre, Milletlerara munasebetler komiteti kelecek afta CQT kontseptsiyasını bermek kerek.
Aprel 1-den itibaren ATR yayınını toqtattı. Mart ayınıñ soñuna qadar ATR media-holdingi Rusiye qanunlarına köre kütleviy haber vastası olaraq öyle de qayd olamadı.
Şirket Roskomnadzorğa vesiqalarını bir qaç kere bergen edi, lâkin olarnı farqlı sebeplerden keri qaytara ediler. Aprel 1-ge keçer gecesi ATR telekanalı, Lâle bala telekanalı işini toqtatmağa mecbur oldılar. «Meydan» ve «Lider» radioları da diñleyicilerinen sağlıqlaştılar. Reberlik telekanalnı qayd etmege tırışacağını bildirdi.
ATR qapatılğan soñ cumhuriyetniñ akimiyeti cemaat qırımtatar telekanalını açmağa teklif etti. Olarnıñ fikirince, qırımtatarlar kerçek malümatnı almaq aqqını qullanacaqlar.
