2015 senesi aprel ayında köteklengen, soñra ise FSB (Federal havfsızlıq hızmeti) tarafından sorğuğa çekilgen ve Yaltadaki evinde tintüv keçirilgen İnsan aqları kontakt gruppasınıñ vekili, qırımtatar uquq qorçalayıcısı Emir-Üsein Kuku cinaiy işni açmaq talabını red etken vesiqanı kösterdi.
«Tintüvden evel köteklemek FSB içün – adiy bir iş, qanunğa da uya... Qırım politsiyası böyle tüşüne. Sizni urğan olsalar, maña yapqanları kibi, cinaiy işni açmaycaqlar», – dep yazdı o Facebookta ve Alupka İçki işler nazirligi qararınıñ kopiyasını ilâve etti.
Vesiqada mayıs 1 künü qayd etile. Lâkin, uquq qorçalayıcınıñ malümatına köre, mektüp zarfı oña cumaertesi künü, iyün 6-da, keldi, mektüpte ise mayıs 25 sanı qayd etilgen.
«Sovetlerniñ aynecilikleri – qarar qabul etilgen soñ 1 ay keçti. Şikâyet müddeti bitsin dep. Ya da aksine, zarfnı yollamadan başqa sannı yazdılar. Mayıs 1-de politsiya yolbaşçısı er şeyni taşlap, menim meselemni baqmağandır», – dep qayd etti Emir-Üsein Kuku. O, bu qarardan şikâyet etecegini red etmey.
Qırım uquq qoruyıcıları bunı izaatlamaylar.
Qırım Rusiye tarafından işğal etilgen soñ yarımadada faal, uquq qorçalayıcı, jurnalist, Qırımtatar Milliy Meclisi azalarınıñ sorğuları ve evlerinde tintüvler sıq-sıq keçirilip başladı.
Politsiya, FSB, taqiqat organları yapqan areketlerini izaatlamaylar. Halqara uquq qorçalayıcı teşkilâtlar Qırımda insan aqlarınıñ bozulması artqanını bildireler. Qırımnıñ şimdiki akimiyeti bunı inkâr ete.
