Link açıqlığı

Ekspert: Erdoğan akimiyette qalmaq içün qırımtatar meselesine başqaca yanaşmağa mecbur olacaq


Yaqın Şarq tedqiqleri merkeziniñ müdiri İgor Semivolosnıñ fikirince, Türkiyede ükümran Adalet ve Kalkınma Partisiniñ (AK Parti) devri soñuna kelmekte. Saylayıcılar Erdoğannıñ tış siyasetini, şu cümleden Qırım meselesine yanaşqanını begenmeyler.

Bunı ekspert Qırım.Aqiqatqa ayttı.

«Tış siyasetniñ eñ qıyın meselelerinden biri Türkiyeniñ uzun bir müddet devamında Qırım ve qırımtatarlarğa nisbeten nasıl yanaşqanınıñ belli olmağanıdır. Böylece, Erdoğannıñ siyasetine qoltutqanlardan bazıları ükümran firqağa rey bermedi», – dep ayttı Semivolos.

Yaqın Şarq tedqiqleri merkeziniñ müdiri dey ki, qırımtatar meselesi yañı parlamentte kürd meselesinen beraber er bir firqanıñ kün tertibinde olacaq.

«Ve, belli ki, Erdoğan akimiyette qalmaq içün qırımtatar meselesine başqaca yanaşmağa mecbur olacaq. Bunı iqtisadiy menfaatlarnı köz ögüne alıp nasıl al etecekler, Rusiye yönelişi ile nasıl bağ tutacaqlar, bu büyük munaqaşanıñ mevzusıdır», – dep tüşüne Semivolos.

Saylavlarnıñ ilk neticelerine köre, Türkiye prezidenti Recep Tayip Erdoğannıñ Adalet ve Kalkınma Partisi reylerniñ 40%-dan ziyadesini aldı – 550 yerli parlamentte 256 yerni qazandı. 2011 senesi ükümran firqa reylerniñ aman-aman yarısını alğan edi. AK Parti Büyük Mecliste çoqluqnı coydı.

Cumhuriyetniñ parlamentine muhalifet Halq Cumhuriyet Firqası keçti (25%), Milliy areket firqası (17%) ve Kürdlerniñ Halqlarnıñ demokratiya firqası (12,5%).

Saylayıcılarnıñ 85% rey berdi – Türkiyede qayd etilgen ve saylavlarda iştirak etmek aqqı olğan 53,7 mln insandan 37 mln.

XS
SM
MD
LG