Ukraina prezidenti Petro Poroşenko cenk vaziyetiniñ uquqiy rejimi aqqında qanunnı imzalap, Yuqarı Radağa keri qaytardı. Bunı bazarertesi künü, iyün 8-de, ukrain parlamentiniñ saytı bildire.
Prezidentniñ özü teklif etken qanunnı Yuqarı Rada mayıs 12-de qabul etken edi. O, 2000 senesinden berli olğan qanunnıñ yerini alacaq.
Yañı qanun resmiy şekilde derc etilgen soñ işke tüşürilecek.
Qanun cenk vaziyetiniñ uquqiy rejimini, onı kirsetüv ve lâğu etüv, devlet akimiyeti organları, arbiy komandanlıq, arbiy memuriyetler, yerli idare organları, müessise ve teşkilâtlarnıñ faaliyetini, vatandaşlarnıñ aq-uquqlarınıñ kefillerini ve şirketlerniñ qanuniy menfaatlarını belgiley.
Yañı qanunğa binaen, cenk vaziyeti – Ukrainada ya da onıñ ayrı yerlerinde silâlı istilâ ya da ücüm havfı, Ukrainanıñ devlet mustaqilligi, onıñ topraq bütünligine zarar ketire bilecek telükeli areketlerden sebep kirsetilgen ayrı bir uquqiy rejim.
Qanun devlet akimiyetiniñ organları, arbiy komandanlıq, arbiy memuriyetler ve yerli idare organlarına telükeni toqtatmaq, silâlı istilâğa yol bermemek, Ukrainanıñ devlet mustaqilligini, onıñ topraq bütünligini qorumaq içün vekâlet bere, em de telükeden sebep insan ve vatandaşnıñ anayasa aq-uquqları ve serbestligini, şirketlerniñ menfaatlarını ve uquqlarını müddetni belgilep sıñırlamağa izin bere.
