Ukrainada Qırım ve Donbasstan köçip kelgenlerniñ sayısı 1 million 331 biñ insannı teşkil etti. Bunı bazarertesi künü, iyün 8-de, Ukraina içtimaiy siyaset nazirliginiñ matbuat hızmeti bildirdi.
«2015 senesi iyün 8-ge qadar, vilâyetler ve Kiyev şeeri devlet memuriyetiniñ ealini içtimaiy qoruv bölükleriniñ malümatına köre, Donbass ve Qırımdan köçken 1 331 778 insan ve 1 046 405 qoranta qayd etile», – dep aytıla beyanatta.
İçtimaiy siyaset nazirliginiñ malümatına köre, 318 000 aile maddiy yardım ala.
Qırımtatarlarnıñ lideri Mustafa Cemilev bildirdi ki, Qırım işğali devamında yarımadanı 35 biñ insan terk etti, olardan yarısı – qırımtatarlardır.
Birleşken Milletler Teşkilâtı bergen malümatına köre, Ukrainada memleket içinde köçip kelgenlerniñ sayısı 1 million 228 biñ insannı teşkil etti.
