Qırım ve Astrahan arasında uçaq seferleri açıldı. «Yamal» ava şirketiniñ birinci seferi bazarertesi künü, iyün 8-de, kerçekleştirildi, – dep haber ete TASS.
Birinci uçuş Qırım tarafına daa populâr oldı: Aqmescitten Astrahanğa 18 kişi keldi, Qırımğa ise 41 insan keldi.
Vilâyetniñ sanayı, naqliyat ve tabiat resursları nazirliginiñ matbuat hızmeti bildire ki, uçaq seferleri sentâbr 7-ge qadar olacaq. Uçaq seferleri aftada üç kere 50 insannı sığdırğan CRJ-200 uçağında kerçekleştirile.
«Astrahandan Aqmescitke bilet fiyatı 5,5 biñ rubleden başlay, imtiyazlı bilet – 3 385 ruble. İmtiyazlı biletler bir qaç kün içinde bütün yazğa satın alındı», – dep aytıla haberde.
Rusiye naqliyat nazirligi 2015 senesi Qırımda uçaq seferlerinden faydalanğan üç million turist olmasını beklegenini bildirgen edi.
2014 senesi mart ayında Rusiye yarımadanı işğal etken soñ Qırım ava limanları Ukraina ükümetiniñ qararı ile qapatıldı. Anda kerçekleştirilgen ava seferleri Ukraina qanunlarını ve halqara qaidelerni bozmaqta, böylece ava şirketleri Ukraina ve ICAO halqara cezalarına oğray bile.
Al-azırda yalıñız Rusiye ava şirketleri Qırımğa uçaq seferlerini kerçekleştire.
