Link açıqlığı

Devlet dumasınıñ Qırım işğaline qoltutmağan deputatı Ponomarevni mandatsız qaldırmaq isteyler


İlya Ponomarev

«Adaletli Rusiye» fraktsiyası İlya Ponomarevni Devlet dumasınıñ deputatı mandatından marum qaldırmaq içün vesiqalarnı azırladı. Bunı «Adaletli Rusiyeniñ» lideri Sergey Mironov bildirdi. Onıñ aytqanına köre, bunıñ kibi bir muracaat afta soñu kirsetilecektir.

Mironovnıñ bildirgenine köre, böyle bir qarar İlya Ponomarevge qarşı açılğan cinaiy iş ile bağlı degil, o, keçken seneniñ sentâbr ayından itibaren parlamentniñ aşağı palatasınıñ toplaşuvlarına kelmey.

Qırım.Aqiqat bildirgeni kibi,Rusiye Devlet duması İlya Ponomarevni deputat toqunmasızlığından marum qaldırdı. Böyle bir qarar reylerniñ ekseriyeti ile aprel 7-de qabul etildi. 438 deputat buña qoltuttı, bir kişi qarşı çıqtı.

Taqiqat komiteti oña qarşı «Skolkovo» fondundan 22 million rubleni hırsızlağanından cinaiy iş açtı.

Al-azırda deputat Amerika Qoşma Ştatlarında buluna.

Peterburg deputatı Vitaliy Milonov Rusiye Devlet dumasınıñ reberligine muracaatta bulunıp, İlya Ponomarevniñ deputat mandatını vaqtından evel toqtatmağa rica etti. Onıñ aytqanına köre, Ponomarev Qırım meselesinde «Rusiyege qarşı çıqıp», «satqın ve Vatan haini unvanına» nail oldı.

İlya Ponomarev – Qırım işğaline qarşı çıqqan yekâne Rusiye deputatı. O, qabaatını red etip, bu mesele siyasetnen bağlı olğanını ayta.

XS
SM
MD
LG