Keriç parom keçiti ava bozulğanından işini kene toqtattı. Bunı bazarertesi künü, iyün 8-de, «Morskaya direktsiya» bildire.
Berilgen malümatqa köre, Keriç boğazında yel süratı saniyede 20 metrni teşkil ete. Tahminlerge köre, salı künü, iyün 9-da, böyle ava olacaq. Yel süratı ise saniyede 13-18 metrni teşkil etecek.
Paromlar vaziyetke köre seferlerge çıqacaqlar. Al-azırda «Krım» limanındaki parom nevbetinde – 1704 maşina ve 4916 yolcu. «Kavkaz» limanında 929 maşina ve 2934 yolcu nevbetini bekley.
«Qayd etilgen müddette «Kavkaz» ve «Krım» limanlarında yolcu ve naqliyat vastalarınıñ nevbeti olmasın dep, OOO «Morskaya direktsiya» Keriç parom keçiti tarafında ziyaretlerden vazgeçmege rica ete», – dep haber ete müdirlik.
Qırım.Aqiqat bildirgeni kibi, iyün 7-de qasırğa yeli Aqmescitte tereklerni yıqtı ve pıtaqlarını sındırdı.
