«Yedi gruppası» devletleriniñ liderleri Moskvanıñ Ukraina zıddiyetinde rolü içün cezalarnı quvetleştirmege azır olğanı aqqında Rusiyeni tenbiyelediler. Bunı Büyük Britaniya, Kanada, Frenkistan, Almaniya, İtaliya, Yaponiya ve Amerika Qoşma Ştatlarınıñ liderleri iyün 8-de Bavyera Alplerinde olıp keçken eki künlik sammitten soñ bildirdiler.
Cezalarnıñ müddeti «Rusiye tarafından Minsk añlaşmalarına riayet etilmesi ve Ukraina mustaqilligine sayğı kösterilmesi ile» bağlı, – dep aytıla beyanatta.
G7 liderleriniñ qayd etkenine köre, «Rusiyeniñ areketleri cezalarnıñ quvetleştirilmesini talap etse, sıñırcı areketler devam ettirilecek».
Bu sene fevral ayında imzalanğan Minsk añlaşmaları feval 15-ten itibaren Donbassta ateş toqtatılmasını, em de çatışma yerinden ağır silânıñ çektirilmesini belgiley. Lâkin añlaşma şartları bütünley yerine ketirilmey, taraflar bir-birini qabaatlaylar.
Rusiye ve Ğarpnıñ munasebetleri Ukraina vaziyetinden kerginleşti. Keçken sene iyül ayında Avropa Birligi ve AQŞ Rusiye iqtisadiyatınıñ sektorlarına qarşı cezalarğa başladılar. Rusiye ise cezalarnı kirsetken milletlerden aşayt mahsulatınıñ italâtını sıñırladı.
