Ukraina Nazirler şurası Rusiye tarafından işğal etilgen Qırım ile memuriy sıñırnı keçüv qaidelerini tasdıqladı.
Ukraina ükümetiniñ iyün 4 qararı Nazirler şurasınıñ saytında bazarertesi künü, iyün 8-de, yerleştirildi.
Vesiqağa binaen, Qırımğa kirmek ya da andan çıqmaq içün «gece-kündüz çalışqan kiriş noqtalarından keçmek kerek».
«Nezaret noqtalarında işğalci devletniñ timsalleri, vaqtınca işğal etilgen topraqnıñ timsalleri ya da olarnıñ elementleri olmamalı», – dep aytıla qararda.
Ukraina vatandaşları memuriy sıñırnı keçmek içün vatandaşlıqnı tasdıqlağan vesiqanı (iç, tış, vazife, diplomatik pasport.yu deñizci şeadetnamesi, balanıñ vesiqası) köstermek kerekler, dep aytıla qararda.
Çetel adamları ve vatandaşlığı olmağan şahıslar pasport vesiqalarını ve Ukraina Devlet migratsion hızmeti bergen mahsus ruhset vesiqasını köstermek kerekler.
Qararda aytıla ki, İnfrastruktura nazirligi nezaret kirişlerini azırlay ve baqa.
2014 senesi mart ayında Qırım Rusiye tarafından işğal etilgen soñ qıtaiy Ukraina ve yarımada arasında memuriy, asılında ise – tam bir sıñır peyda oldı. Qırım vaqtınca işğal etilgenini ilân ettiler.
Şimdiki vaqıtta Qırımnıñ qıtaiy Ukraina ile «sıñırında» üç kiriş sıñır noqtası mevcut: «Or Qapı», «Armânsk» ve «Canköy», soñki ekisini Rusiyede halqara dep adlaylar.
