Türkiye baş prokuraturası Rusiyege qoltutıp faaliyet köstergen ve Qırım akimiyeti ile işbirlik tutqan Türkiye qırımtatar teşkilâtları Federatsiyasınıñ qapatılması ile bağlı iş açtı, dep haber ete QHA.
Türkiye İçki işler nazirliginiñ cemiyetler bölügi taqiqat keçirip, Ünver Selniñ yolbaşçılığında faaliyet köstergen Türkiye Qırımtatar teşkilâtları Federatsiyası Türkiye qanunlarını bozğanını ögrendi. Qanunğa köre Türkiye Qırımtatar teşkilâtları Federatsiyasınıñ erkânında eñ azından 5 kişi olmalı, lâkin Türkiye İçki işler nazirligi Federatsiya bu talapqa riayet etmegenini belgiledi. Federatsiyanıñ eki azası teşkilâttan çıqtı. Bundan ğayrı, teşkilâtnıñ daa bir azası teşkilâttan ayıralacağını bildirdi, lâkin federatsiyanıñ reberligi bunı yerine ketirmedi.
Teşkerüv neticelerine binaen, qanunğa köre Türkiye Qırımtatar teşkilâtları Federatsiyası daa 2011 senesi faaliyetini toqtattı. Böylece Ankaranıñ Baş prokuraturası Türkiye Qırımtatar teşkilâtları Federatsiyasınıñ qapatılması içün iş açtı.
Mezkür işni baqqan mahkeme vekilleri Federatsiyanıñ adresi boyunca bir kimseni tapmadılar. Böylece, Türkiye Cumhuriyeti Ünver Sel cemiyet ve hususan qırımtatarlarnı aldatqan, dep qarar çıqardı. Ünver Sel öz faaliyetinde olmağan unvan ve vazifeni qullandı, em de 2011 senesinde faaliyetini toqtatqan Türkiye Qırımtatar teşkilâtları Federatsiyasınıñ adından çıqışta buluna edi.
Ünver Selniñ yolbaşçılığında qurulğan yañı bir teşkilât da şübe doğurmaqta, dep haber ete QHA.
Qırım.Aqiqat bildirgeni kibi, Türkiye Qırımtatar teşkilâtları Federatsiyası Qırım Cumhuriyetiniñ Rusiye Federatsiyası ile birleşüvine qoltutqan edi.
