Ukraina Yuqarı Radası qaraylar ve qırımçaqlarğa tamır halq statusını berecek qararnı qabul etmege planlaştıra. «Ukraina Yuqarı Radasınıñ Ukrainada qaraylar ve qırımçaqlarnıñ medeniy mirasını saqlap qaluv beyanatı aqqında» qarar leyhası qayd etildi ve kelecek afta sessiya zalında rey berilecek.
Bunı qarar leyhasınıñ müellifi, Yuqarı Radanıñ insan aqları, milliy azlıq ve milletlerara munasebetler meseleleri komitetiniñ reis muavini Georgiy Logvinskiy Qırım.Aqiqat mühbirine bildirdi.
Onıñ aytqanına köre, vesiqa iyün 2 künü Yuqarı Rada plenar toplaşuvınıñ kün tertibinde bar edi, lâkin onıñ baqılmasını qaldırdılar. «Ümüt etem ki, bu qararnıñ muzakere etilmesine vaqıt taparıq», – dep ayttı Georgiy Logvinskiy.
Onıñ qayd etkenine köre, bugünki künde Qırımnıñ resmiy tamır halqı qırımtatarlar ola.
«Bizler qırımtatarlarnen bağlı bunıñ kibi qararnı qabul etip, olarnı Ukrainanıñ tamır halqı olaraq tanıdıq. Lâkin al-azırda Rusiye halqara toplulıq ve Birleşken Milletler Teşkilâtı seviyesinde Qırımda Rusiyeniñ az sayılı halqları, qaraylar ve qırımçaqlar, bar olğanını qayd etmege tırışa. Ve Ukraina bu halqlarnı tamır halqları olaraq qayd etmegenine esaslana. Aynı bu sebepten hatanı tüzetemiz», – dep añlattı Logvinskiy.
Yuqarı Radanıñ medeniyet ve din komitetiniñ reisi Nikolay Knâjitskiy Qırım.Aqiqatqa qayd etti ki, Qırım Ukraina olıp qala, ve, «tabiiy ki, Ukraina devleti tamır halqlarınıñ medeniyet mirasınıñ kelecegini tüşüne».
«Bugün bu – bir adım. Qırım azat etilgen soñ belli areketler yapılacaq», – dep qayd etti Knâjitskiy.
2014 senesi mart 20-de Yuqarı Rada qırımtatarlarnı tamır halqı olaraq tanıp, 2007 senesi Birleşken Milletler Teşkilâtınıñ tamır halqlarınıñ aq-uquqları Deklaratsiyasına qoşuldı.
