Jurnalist, cemaat erbabı, Dnepropetrovsk yeudiy cemiyetiniñ idare azası Oleg Rostovtsev Dnepropetrovsktaki Kirov caddesine Petro Grigorenko adını bermege teklif etti.
Bunı o Qırım.Aqiqat mühbirine bildirdi.
Bu teklifini Rostovtsev Kiyevde Meclis reisi Refat Çubarov ve tarihçı Gülnara Bekirovağa yetkizdi. Onıñ fikirince, teşebbüs qırımtatar halqından kelmek kerek. Rostovtsevniñ zanınca, qırımtatarlar böyle bir teşebbüsni seslendirgen soñ yerli akimiyetniñ qararı da belli olacaq.
«Men qırımtatar teşkilâtlarına teklifimni bildirdim, mence, böyle bir teşebbüs olardan kelmek kerek. Çünki yeudiyler de holokost vaqtında yeudiy olmayıp adamlarnı qorçalağan insanlarnı añalar – bizim içün yeudiy olmayıp, yeudiyler içün canını feda etmege azır olğanlarnı hatırlamaq müim bir şeydir. Mence, qırımtatar halqı general Grigorenkonı yeudiy ve ukrainlerden çoñ hatırlamaq kerek», – dep qayd etti Rostovtsev.
O, qırımtatar halqına qoltutqanını bildirdi.
«Dnepropetrovskta qırımtatar halqı ile añlaşmamız bar, bizler olarnıñ tarihiy vatanına qaytıp kelmek ıntıluvlarına qoltutamız ve «Yeudiy halqı ve Ukrainada Holokost hatırası» müzeyimizde Qırımnıñ tamır halqları, qırımtatar sürgünligi ve Rusiye ve sovet işğalinden zarar körgen diger halqlarğa bağışlanğan büyük sergi bar. Bizim içün bu pek müimdir», – dep ayta o.
Rostovtsev qayd etti ki, «Grigorenko epimiz içün, bütün etnik gruppalar içün insannıñ namuslı areketleriniñ örnegi ola».
Qırımtatar cemaatı ve Meclis reberligi işbu teşebbüske daa cevap bermediler.
Petro Grigorenko – Sovet Sotsialistik Cumhuriyetleri Birliginiñ silâlı quvetleriniñ general mayorı, uquq qorçalayıcı, Ukrain Helsinki gruppasınıñ esasçısı, qırımtatar halqı aq-uquqlarınıñ qorçalayıcısıdır.
