Link açıqlığı

Rusiye Taqiqat komiteti Cemilevni qarşılağan qırımlılarğa qarşı yañı cinaiy işlerni azırladı


2014 senesi mayıs 3-te qırımtatarlar Turetskiy Val kiriş noqtasında

Qırımnıñ Rusiye Taqiqat komitetiniñ idaresi 2014 senesi mayısta «Turetskiy Val» rayonında «Berkut» hadimlerine ketirilgen zarar boyunca cinaiy işlerniñ taqiqatını yekünledi.

2014 senesi mayıs 3-te qırımtatar halqı milliy lideri Mustafa Cemilevni Qırım kirişinde qarşılağan edi.

Qırım Taqiqat komiteti bildire ki, cinaiy işniñ taqiqatı üç qırımlığa nisbeten keçirildi.

«Olar Rusiye Ceza kodeksiniñ 318-inci maddesiniñ 1-inci qısmına ait cinayette (akimiyet vekiliniñ vazifesini yapqanından sağlıq içün telükeli zorbalıq qullanuvı) qabaatlana», – dep aytıla beyanatta.

Taqiqatnıñ malümatına köre, 2014 senesi mayıs 3-te qabaatlanğanlar «Armânsk» («Turetskiy Val») kiriş noqtası yanındaki yolda «Berkut» hadimlerine beden zarar ketirdiler.

«Cinaiy işniñ taqiqatı devamında qabaatlanğanlarnıñ şahsiyetleri belgilendi, olarnıñ cinayetke alâqasını isbatlağan deliller toplandı. Cinaiy iş qabaat qararınıñ çıqarılması içün prokuraturağa yollandı», – dep haber ete Qırım Taqiqat komiteti.

Bundan evel berilgen malümatqa köre, mezkür işniñ şahıslarından biri Qırımda şartlı olaraq mahküm etilgen.

2014 senesi mayıs 3-te Mustafa Cemilevni Armânsk nezaret-kiriş noqtasında Qırımğa kirsetmediler. Biñlernen qırımtatarı liderni qarşılamağa keldi. Mında OMON, Qırımnıñ «samooborona» vekilleri de silâ ile keldiler.

Bundan soñra Qırımda aktsiyanıñ iştirakçilerini yaqalamağa başladılar. «Mayıs 3 işi» boyunca 5 kişi apiske alınğan edi.

XS
SM
MD
LG