Rusiye keçken sene iyün ayında Lugansk vilâyetinde öldürilgen Rusiye jurnalistleriniñ ölümine alâqası olğanında qabaatlanğan ukrain arbiyi Nadejda Savçenkonı mahkemeden soñ Ukrainağa bere bile.
Bunı uçucınıñ adliyecisi İlya Novikov «Novaya gazeta» intervyüsında ayttı.
Onıñ fikirince, «cemaat fikri» meselesinde kerek olğan şeylerni Kreml mahkeme neticesinde alacaq. Onıñ ilerideki taqdiri Rusiye akimiyetine tek zarar ketirecek, çünki Ğarp ukrain arbiy uçucısını azat etmege talap etip, Rusiyege basqı yapmağa devam etecek, dep tüşüne adliyecisi.
Onıñ zanınca, mahkeme Savçenkonı 13-16 yılğa qadar azatlıqtan marum qaldırmaycaq.
Nadejda Savçenko keçken seneniñ iyül ayından itibaren Rusiye apishanesinde buluna. O, qabaatını red etip, separatistler tarafından esir alınğanını ve Ukrainadan Rusiyege qanunsız alda çıqarılğanını bildire. Ukrain arbiyi eki kere açlıqnı ilân etken edi. Mayıs ayınıñ başında Savçenkonıñ apis müddeti iyün 30 kününe qadar uzatıldı.
Mayıs ayınıñ soñunda Taqiqat komiteti işniñ ilk taqiqatı soñuna yetkenini bildirdi. Bu afta Savçenko işini ögrenmege başladı. Buña bir buçuq ay kete bile.
