Ukraina prezidenti Petro Poroşenko eñ yaqın vaqıtta Rusiye tarafından işğal etilgen Qırımnı Ukrainağa qaytaruv strategiyasını taqdim etmege söz berdi.
Bunı o iyün 5-te Kiyevde matbuat konferentsiyasında ayttı, dep haber ete Qırım.Aqiqat.
«Strategiya azır ve Milliy havfsızlıq ve mudafaa şurasına berildi, tezden onı taqdim etecekmiz», – dep ayttı Poroşenko.
Onıñ qayd etkenine köre, Qırım «referendumında» iştirak etken şahıslar ve şirketler, em de ava ve deñiz boşluğını bozğanlarğa qarşı içtimaiy, iqtisadiy ve diger cezalarnıñ cedveli tizildi.
Poroşenko Rusiye tarafından işğal etilgen Qırımnıñ qaytarılması Ukraina içün eñ müim şey olğanını bildirgen edi.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
2014 senesi mart 21-de Rusiye prezidenti Vladimir Putin «Qırım ve Aqyarnıñ Rusiyege federatsiya subyektleri olaraq qoşmaq» qanunını azırladı.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
