Link açıqlığı

«KrımSOS» teşebbüsi Ukrainada qabul etken taraflar ve köçip kelgenler arasında munasebet monitoringiniñ neticelerini aşkâr etti. Şu cümleden, faaller ukrain toplulığında Qırım ve Donbasstan köçip kelgenler aqqında olğan stereotiplerni ögrendiler. Qırımtatarlarğa ayrı bölük bağışlanğan edi.

Monitoring 2015 senesi yanvar 16 – mart 7 künleri arasında Ukraina beş şeerinde keçti: Kiyev. Herson, Lviv ve Vinnitsa. Monitoring devamında eskpertler 67 matbuat vastasını talil etip, 900 insan ile subetleşti.

Malüm olğanı kibi, köçip kelgenlerge yerli eali tarafından bitaraf ve müsbet munasebet kösterile.

«Cemaatçılıqta köçip kelgen qırımtatarlarğa munasebet, umumen alğanda, tolerantlıdır. Yerli ealiniñ büyük bir qısmı qırımtatarlarnı Qırım işğaline qarşı çıqqan ve siyasiy dünya baqışlarından sebep Qırımnı terk etken insanlar olaraq tanıy», – denile beyanatta.

Hersonda yerli ealiniñ soravı vaqtında yerli sakinlerniñ 60% tek 5% köçip kelgenlerge menfiy munasebetini bildirdi. Lvivde – 60%-dan 51% qırımtatarlarğa müsbet munasebetini qayd etti. Vinnitsada soravdan keçken 20% sakinlerniñ yarısından çoqusı müsbet davrana.

Vinnitsa ve Lvivde camilerniñ qurucılığı planlaştırıla, soravdan keçkenler buña da eyi munasebette buluna.

Qırımtatarlarğa nisbeten stereotipler arasında musulmanlarğa muqayt ve aş meselesindeki mevamlarına nisbeten şübeli munasebet belgilengen.

Ukraina Fevqulâde vaziyetler boyunca Devlet hızmetiniñ malümatına köre, mayıs 28 kününe qıtaiy Ukrainada Qırımdan köçken 20 biñ 653 insan qayd etilgen. Mecliste bildirilgeni kibi, Qırımdan köçip kelgen 20 biñ insandan yarısı – qırımtatarlarıdır. KrımSOS cemaat teşkilâtınıñ malümatına köre, aqiqaten yarımadanı 45-50 biñ insan terk etti.

XS
SM
MD
LG