Link açıqlığı

Qırım «Artek»inde Rusiye bayrağı altında Ukrainağa sadıq olğan hadimler daa qala – baş müdir


«Artek» halqara bala merkeziniñ bir elli hadimi Qırımdan qıtaiy Ukrainağa köçti, amma yarımadada Ukrainağa sadıq qalğan hadimler daa bar.

Bunı Kiyevde matbuat konferentsiyası vaqtında Andrey Dovjenko añlattı – «Artek» halqara bala merkezi» Ukraina devlet şirketiniñ baş müdiri bildirdi.

«Artek – büyük strukturadır: 218 ga topraq, yüzlerce bina, avtobaza, tibbiy hızmet ve ilâhre. Qırım işğalinden evel «Artek» kollektivini pedagogik ve pedagogik olmağanğa bölmek mümkün. Daima çalışqan insanlarnıñ umumiy sayısı – 2200 insandır. Qıtaiy Ukrainağa köçkenler – esasen ocalar, yaşlar – 50 insan», – dey Dovjenko.

«Artek» halqara bala merkezi» Ukraina devlet şirketi bu yazda işine devam ete ve Qırım işğali vaqtına Kiyev vilâyetine köçe. Şimdilik lager «Puşça-Ozörnaya» şifahanesinde olacaq.

Malüm ki, 2014 senesi qıtaiy Ukrainağa köçken «Artek» hadimleri «Artek-Karpatı» lagerini teşkil ettiler. Mında qıtaiy Ukrainağa Qırım «Artek» lagerinden köçken ocalar çalışa.

Sergey Berezenkonıñ aytqanına köre, şimdi «Puşça-Ozörnaya» kompleksiniñ bala merkezine uyğunlaştıruvı kete.

Berezenko qayd etkeni kibi, iyün 16 künü «Artek»niñ 90 yıllığı qayd etile. Lager tarihında bu kibi köçüvler endi olğan edi. Ekinci cian cenki vaqtında lagerni Altay taraflarına keçirgen ediler.

Ukraina Baş prokuraturası yanındaki QMC prokuraturaı Qırımda «Artek» halqara bala merkeziniñ «milliyleştirüvi» boyunca cinaiy iş açtı.

Ukraina Tış işler nazirligi UNESKO, halqara teşkilâtlarnı, dünya toplulığını Qırımnıñ şimdiki akimiyeti tarafından «Artek»niñ Rusiye federal müliketine berilmesini takbih etmege çağırdı.

Nazirlikte şunı qayd eteler ki, 2006 senesi Ukraina ükümeti ve UNESKO arasında Ukraina devlet şirketi – «Artek» halqara bala merkezine UNESKO imayesi altındaki merkez statusınıñ berilmesi aqta añlaşma tizildi.

XS
SM
MD
LG