Qırım işğali «beloruslarnıñ ücüz istiraatını kömdi», – denile Naviny.by saytında, BelaPAN mustaqil agentliginiñ internet-versiyası.
Bildirilgeni kibi, bıltır Aqrusiyeniñ turistik çarşısı 90% zarar kördi: malüm ki, beloruslar ukrain yarımadasındaki raatlığını afzal köre edi. Bu sene de tahminler eyi degil – Bulğaristan, Yunanistan, Türkiye ve Rusiye bile belorus turisti içün paalıdır.
Qırımğa qadar adetiy yol yañı şaraitlerde ve Keriç keçiti yardımı ile eki künni qaplap ala. Moskvadan uçaqlarğa biletlerniñ fiyatları da beloruslarnı celp etmey.
Maqalede yazılğanı kibi, Odessa istiraatı Qırımğa yaqın kele, amma beloruslar anda Ukraina vaziyetinden sebep barmaqtan saqına.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
